مصر وحشاني ونفسي أحس اني في بيتي

[Alex lover]

امبارح كنت باتكلم مع اخويا وجوزي في مناقشة حبيت تشتركو معايا فيها .. هو بيقولي ليه على طول عايزة ترجعي بلدك رديت عليه وقلتله لاني باحس في الغربة اني نفسي مكسورة وراسي مش مرفوعة ،وقاعدة شيفة وعارفه اني مش مقبولة ، طبعا باشتغل طبعاً مش عايشة عالة على احد . انا وجوزي طالع عينا ومع ذلك مازلنا ضيوف ومالناش الحق في اغلب الامتيازات ، لو ماشية في الشارع خايفة مش حاسه بالامان لو حصلت مشكلة لا قدر الله متأكده اني هاتظلم لاني اطلع مين هنا ، وحشني احساسي بالامان .. تمشي رافع راسك وسط الدوشة والظروف الصعبة حاسس انك لو وقعت هتلاقي الف ايد تتمد لك .. وتشدك وتسندك .. نفسي انزل الشارع في مصر وانا عارفه ان شمال يمين فوق تحت دول اهلى ,, عارفيني مش خايفين مني ,, مش بيقولو من ورايا ده دخيل حاقد علينا واكل خيرنا ، لان الخير خيرنا كلنا والفقر كلنا عايشنه وراضيين بيه ,, وحشتني مصر يامصريين وحشتني اختى وكوباية الشاي معاها في البلكونة في ساعة عصرية وايد حنينة تطبطب عليا وقت ما اكون تعبانه ، .. وحشني (صباح الفل .. صباح العسل .. صباح الجمال ) من افواه غلبانه كل يوم تتقال حابين بعضهم وفي القلب ميت موال ،واه يا بلد ياللي حرمتى الابن من امه والاب من صوت العيال .. أه يا بلد حني علينا بقى وارحمي
قلت اكتر من كده كمان وبكيت وانفعلت وحسيت اني جوايا جمرة نار بتحرقني .. عارفين ايه جمرة النار دي ، دي نار الغربة اول مرة احس بطعمها ..
وحشتني مصر يا مصريين ونفسي احس اني في بيتي في وطني واكون انا صاحبة البيت .. واهلا بالمغتربين

[المستشار القانونى]

طب لية يا اليكس فكرتينا ما هى كانت ماشية وايام بتعدى لحد ما ييجى الفرج وننزل اجازتنا ونحضن اهلنا وحبايبنا وكل اللى نعرفه ونحضن تراب مصر

واحساسك ده واصل لكل انسان اتغرب بعيد عن بلده وياريت كل مصرى عايش فى ارض مصر الان يقولها انها وحشتنا
تعرفى انا من امبارح وانا مش طايق الكويت خالص علشان مصر وحشتنى علشان امى وحشتنى علشان ابويا واخواتى وحشونى علشان صحابى وحشونى وقاعده القهوة اللذيذة ولعب الطاولة بعد ما كنا نخلص شغل رمال كل شط فى مصر وحشتنى بجد امبارح بس كنت عايز انزل مصر بس انتى عارفه اننا بنبقى مرتبطين بشغل لازم نخلصه يعنى وقتنا ومجهودنا مش لينا حتى لو كان فيه مقابل مجزى بس برضه مش لينا لانهم بياخدوا منا صحتنا وتعبنا وكل شئ حلو فى حياتنا وبعد ما قريت كلامك حسيت ان مصر غالى علينا قوى حسيت فى كلامك اهلى وحبايبى وصحابى حسيت ان احنا فى الغربة مش ملك نفسنا ملك ناس بتتدينا علشان ندلهم كل ما نملك من جهد وصدقونى يا جماعه فعلا لو كل واحد اشتغل فى بلده زى ما بيشتغل بره بلده هنبقى اعظم بلد فى الدنيا حقيقى كنا هنبقى كدا بس مش بايدنا شئ لاننا مش مالكين نعمل شئ فى بلدنا بس اكيد هييجى الوقت الى نرجع فيه بلدنا ونديها وتدلنا بس خوغى كلة انى ارجع بعد ما يكون كل اللى عندى عطيته فى بلاد غريبة
قالبتى علينا المواجع يا اليكس اللى مصبرنا الصحبة الحلوة اللى عايش معاهم فى الغربة بجد كنت الدنيا ضلمة قبل ما نتقابل ونتعرف وننشغل ببعض كل اعضاء الكويت فى المحطة حتى لو متقابلناش فى مكان بنتقابل فى المحطة وده اللى مصبرنا على الايام اللى هنا ويارب صبرنا
بحبكوا يا محطاواتية الكويت بجد بحبكوا كلكوا
اتبسطى يا اليكس ناقص بقى نعيط على الارصفه دلوقتى

[eltayer]

انت بتقول فيها يا وائل والله انا اول مقرأت كلام اليكس وانا عاوز اعيط

والفكره لعبت بدماغي بس للاسف مش هقدر انزل السنادي شكلها فيها كمان سنه

علي الاقل انتوا عندكوا صحبة وبتتقبلوا بس انا للاسف هنا معرفش حد خالص
وعلطول وحيد هنا

[Alex lover]

وائل انا مش بس هعيط انا قلبي واجعني وحاسه اني هاعيش واموت هنا وهتفتكروا الكلام ده في يوم من الايام وعلى رايك واخده مننا جهدنا وصحتنا وتركيزنا وفلوسنا ، ايوه فلوسنا شوف بتدفع اقامات كام وبتدفع في البقالات كام ماهو بييجي باليمين ويروح لالشمال وادينا ماشيين .. اسفه اني قلبت عليك المواجع بس اكيد هو ده دور المحطة بتاعتنا (ملتقى ) نتقابل ونفضفض ونهون على بعض ولا ايه ؟

[Alex lover]

يا طاير انا بقالي سنتين منزلتش ، اولادي ما يعرفوش خالتهم او بمعنى اصح نسيوها ... لما فكرهم بيها يقولولي عليها في الصور مين دي يا ماما (ابني اللي بيقول كده ابنها بالرضاعة) تخيلوا .. حاجات صغيرة بتفرق وبتزيد قلوبنا حرقه ... وبعدين يا طاير احنا كلنا اخوات انت بقيت واحد مننا واحنا يعني كلنا بنتقابل اهو اسبوع اه واسبوع لأ .. شد حيلك وتعالى اشتغل هنا ويانا اهو نكمل العدد

[أنا ناس]

،واه يا بلد ياللي حرمتى الابن من امه والاب من صوت العيال .. أه يا بلد حني علينا بقى وارحمي

الكلمه دي اثرت في جدا

فكرتيني ايام مكنت في الكويت

وجا جوزي رجع مصر وكان وقتها معيش غير يوسف ورحت اعدت مع بابا وماما وفضلت سنه هناك

وفي لحظة ياس من الحياه لم اعد اقوى على تحمل الغربه وعذابها وقررت العوده لمصر وكان قرار صعب ولكن قررته في لحظه اتصلت بمكتب الطيران وحجزت تذكرتين ليا ولابني واتصلت بزوجي وقلت له هذا الخبر الى مصدقش نفسه من السعاده

وبعدها كلمت امي واخبرتها معاد تذكرتي واخدت شارع الخليج رايح جي وصفيت كل اموري من الكويت في شهر

وجيتلك يا مصر فاتحه دراعاتي

وجيت لقيت الغربه هنا امر

ولقيت نفسي منغير لا اب ولا ام ولا اخ ولا اخت ولا زوج حتى نوره طبعا في محافظه تانيه والعائله محافظه تالته

قلبتي عليا المواجع ليه بس يا اليكس المهم انكم هنا معايا اعده معاكم 24 ساعه في اليوم

ربنا ميحرمني منكم انتم كمان يا احلا محطه

[eltayer]

يا طاير انا بقالي سنتين منزلتش ، اولادي ما يعرفوش خالتهم او بمعنى اصح نسيوها ... لما فكرهم بيها يقولولي عليها في الصور مين دي يا ماما (ابني اللي بيقول كده ابنها بالرضاعة) تخيلوا .. حاجات صغيرة بتفرق وبتزيد قلوبنا حرقه ... وبعدين يا طاير احنا كلنا اخوات انت بقيت واحد مننا واحنا يعني كلنا بنتقابل اهو اسبوع اه واسبوع لأ .. شد حيلك وتعالى اشتغل هنا ويانا اهو نكمل العدد

والله انا حاسس بالموضوع ده لاني كنت فيه وانا صغير كان والدي مسافر ورجع وانا كبير دلوقتي انا اللي مسافر
بس مش متجوز فالعمليه بالنسبالي مش صعبة قوي

بس تعرفي اللي فارق معايه شويه اولادي اخواتي يعني انا سبتهم صغيرين يدوب يعرفوني حتي مكنوش اتكلموا
دلوقتي اللي اتكلم واللي هيتولد بعد شهر

يعني هرجع مش هلاقي حد يعرفني ولو قررت السفر تاني خلاص كل معلماتهم عني ان لهم خال مسافر بره

بس اللي مأثر فيا بجد هو احساس الوحده هنا في الغربة يعني مش كفايه غربه لا ووحده كمان

تعرفي انا والله كنت بتمني اكون في الكويت عشان اروح الاجتماعات دي بس

[المستشار القانونى]

وائل انا مش بس هعيط انا قلبي واجعني وحاسه اني هاعيش واموت هنا وهتفتكروا الكلام ده في يوم من الايام وعلى رايك واخده مننا جهدنا وصحتنا وتركيزنا وفلوسنا ، ايوه فلوسنا شوف بتدفع اقامات كام وبتدفع في البقالات كام ماهو بييجي باليمين ويروح لالشمال وادينا ماشيين .. اسفه اني قلبت عليك المواجع بس اكيد هو ده دور المحطة بتاعتنا (ملتقى ) نتقابل ونفضفض ونهون على بعض ولا ايه ؟

فلوس الا الفلوس دى فعلا حقيقة اللى بنصرفه هنا اكتر من اللى بنصرفه فى مصر والله دى حقيقة وكل واحد على ما هو متعود يعنى انا مثلا مفكرتش فى يوم من الايام انى اطبخ طبعه مقضيها بقالى 3 سنوات ونص تيك اواى مطاعم مع انى فى شركة فيها اكل بس باب النجار مخلع بروح اكل بره شركتى وكمان بنصرف خروجات ولبس وهدايا وكل اللى نفسك فيه يعنى عايشة زيك زى الكويتى بتصرفى زى ما بتاخدى يعنى هما فى لانهاية المستفيدين نشتغلهم ونقبض ونصرف عندهم يبقى هم اللى كسبنين مش خسرنين وفى النهاية يقوللنا اننا بناخد خيرهم والله كلام مفترى علينا بيه

[سمـ مصر ــا]

اية ياجماعة فية أية

مصر وحشانا كلنا مفيش شك فى كدة

وكلنا مشتاقين للناس فيها ولشوارعها وكوز درة ساعة عصارى

والغربة توجع القلب مقلناش حاجة لكن أحنا اللى اخترناها ولازم تكيف نفسك عليها

يعنى مش ضرورى انى أفضل تاعب نفسى لغاية الاجازة وحاسس انى غريب

لازم نحاول نتأقلم مع الدنيا فى غربتنا ونعمل لنا حياة نعشها

ونحاول نخرج من اطار الشعور بالغربة

انتى باليكس معاكى أهلك ( زوجك واولادك )يبقى الحمد الله لان عيلتك معاكى

والشخص اللى عايش لوحدة لازم يبحث عن أصدقاء يكون قريب منهم ويخرج معاهم

وميتركش نفسة عايش الغربة على طول

وأوعى تحسى انك مكسورة ابداً ولية مكسورة اعملى اللى انتى عايزاة طالما فى إطار حقك

اتخانقى لو عايزة طالما بتاخدى حقك

حقولك على موقف بسيط حصل لنا من فترة

ابنى فى ثانوى وإنتى عارفة دم الشباب فى الفترة دى فولد كويتى قالة يامصرى وأتكلم بأسلوب

وحش على مصر وضربوا بعض

ولقينا تانى يوم استدعاء من المخفر ابنى ساعة الخناقة طلع قلم من جيبة ورفع الغطا وضرب

الولد التانى بسن القلم خرملة ايدة راح الولد عمل تقرير

واحنا لما جلنا الاستدعاء عملنا تقرير بس كتب الطبيب سجحات وكدمات فقط

وراح زوجى المخفر مع ابنى لقى الولد التانى والدة رتبة وبالبدلة العسكرية جاى مع ابنة

لما دخلوا للضابط طلع الضابط ابو الولد وجوزى وسمع الولد دة لوحدة وسمع ابنى لوحدة

والاخر قال لأيو الولد التانى احنا دولة مؤسسات مش دولة افراد

وانهى الامر بين الولدين وعمل صلح

الدولة هنا ممكن تخدى حقك ومش علشان انتى اجنبية حيضيع حقك .. لا

اسفة للاطالة

بس اوعوا يتسرب لكم احساس الغربة وإلا فى كام سنة حتعشوها هنا حتعجزوا قبل الآوان :smoke1:

[علي ياسين]

السلام و رحمة الله و بركاته .... عليكم اهل الغربة
سؤال عايز حد يجاوبني عليه منكم يا اهل الغربة .. علشان الواحد يستريح ....
ليه الواحد في مصر ديما ً ديما بيقول أمتى اليوم الي الواحد يغور فيه بره البلد دي - انا عارف طبعا اني ما فيش حد بيرضى بالهو فيه ابدا و ده عند الناس كلها - حتى لو شغال هنا في مصر مدير - اه علي فكرة انا لسه هنا في مصر و متابع اخبركوا علي طول و ان شاء الله في أقرب فرصة هحاول أغور بره البلد دي هههههههههه ...و اجى عندكوا هذه البلد التي شهدت ميلادي ... ما علينا المهم - دي أول نقطة ..........و تاني نقطة ... هذا الشعور الذي و الله احسست و انا اقرأه انى في غربة مثلكم و انا مازلت هنا في مصر .........

و اكيد الناس الي متضايقة من الغربة أنا متأكد ان هما قالوا الكلام بتاعي دي قبل ما يسفروا .... صح و لا ايه ؟؟

يا ريت حد يشرح الموضوع ده لأنه فعلا مهم جدا للي بيفكر يسافر .... ليه هذا التناقض الغريب بين الرجوع للحياة في مصر مع كل ما فيها من ضغوط نفسية و اجتماعية و امنية ( اه اه ..معلش امنية دي علشاني انا ....علشان انا ملتحى .. و الدستور ال... أيوه أيوه ... صح عندكو حق .... بلاش نتكلم في السياسة ... ههه ) و حاجات كتير ...كتير .......... و بين الغربة و ما عوضته من مال و راحة ... و ما جلبته من شتات للاهل و الأولاد .....

باختصار.... تعيش في بلدك طالع عينك و مفيش عائد مادي كويس لشغلك .... و لا تعيش طالع عينك برة بلدك و تاخد عائد يرضيك .......... و ياريت الجواب يكون بمنتهى الامانة ........

انا اسف يا جماعة جدا علي التطويل لكن اخر حاجة احب احكيها ليكم .... انا لسة مقابل شاب قادم من العراق و ما ادراك ما العراق قتل ، خطف ، اغتصاب ، تفجير و سرقة .....انا طبعا سبقنى لسانى للسؤال ان احوال اهل العراق فحكى لي ما حكى ..و لكن الشاهد هذه القصة ... هو حكى لي ان واحد منهم اتخطف و هو محاسب مصري و افتدوه بالمال و رجع سالما ...قلت له " طبعا رجع مصر قال كلنا رجعنا مصر فترة .... و بعد ذلك رجعنا الي العراق ثانيا ً ... استعجبت و قلت له " بعد ما حدث " قال - و هو يعمل في بغداد - : " العراق من اجمل دول العالم ...و بها اموال و خيرات كثيره و الحال في مصر لا يشجع . " انتهى كلامه ....و دعوت لهم ان يحفظهم الله ........ فالسؤال.... لماذا اختار هذا الشاب و امثاله أن يعيشوا في بلد يموت الناس فيها في اليوم بالعشرات ..و لا يامن علي نفسة ان يعود الي مسكنه أم لا ..علي ان يرجع الي مصر .......الجواب عندكم انتم
و لن اعقب ..و اترك لكم التعقيب ...و ارجوكم بالله سامحوني علي الاطالة ....

و اسال الله ان يردكم الي دياركم و اهليكم سالمين غانمين غير مظلومين ....و السلام عليكم و رحمة الله و بركاته

[Alex lover]

السيد الفاضل / علي ياسين اولا نرحب بيك في منتداك ونتمنى ان تتقارب وجهات النظر وان اختلفت فهي لا تفسد للود قضية . احب ان اضيف تعقيب على كلامك .. مفيش حد ممكن ينكر ان معظم الشباب في مصر بيقولو الجملة دي ... اللي ذكرتها وده بسبب الظروف النفسية والضغوط المادية ... ومش بس في مصر في دول كتيرة ، ده البنت في بيت اهلها بتقول ( امتى اتجوز بقى واغور من البيت ده وارتاح ) بس تتجوز وتروح بيت جوزها وتلاقيها كل يومين رايحة بيت ابوها وتجري على غرفتها وتسترجع الذكريات .. ايوه استقرت في بيت جوزها ولكن بتحن بالفطرة لبيتها مملكتها وذكرياتها وده شئ غصب عننا كلنا حاجة بتجري في دمنا اسمها (الأصل ) اصولنا وقيمنا وعادتنا اللي اتربينا عليها ..
انا بس حبيت اضرب لك مثال مبسط للي بيحصل مع كل واحد تعب من الحياة وعايز يسافر وبعدين يحن لبلده .. ايوه زهقان وقرفان من الظروف ولكن بعد ما بيجي في الغربه وكفاية اسمها ... ويحس انه ايوه عايش كويس بعد بيضحي بحاجات كتيرة في المقابل يعني مثلا اللي متجوز مضطر يسيب اسرته في مصر علشان يقدر يوفرلهم ويبعثلهم اللي يكفيهم وبلتالي هو محروم من اسرته وده في حد ذاته عامل من اهم عوامل تفكك الاسرة ، او يجيب اسرته هنا ويبقى زي ما لمحت انا ووائل ان الجاي رايح على اكل وشرب واقامات وفسح ومدارس يبقى بس احنا عايشين بناكل ونشرب وندفع اقساط سيارة وغيرها ..
ساعتها بتحس انك مشتاق لبلدك ولحضنها الدافي بغض النظر عن الظروف المادية الصعبة لكننا بشر ومن حقنا نرتاح هتحس بده لما تتعب لا قدر الله وتلاقي ان اهلك في قارة وانت في قارة تانية وهترجع تقرأ مقدمة موضوعي هتلاقي شرح للكلام ده

اما بالنسبة لاصحابك بتوع العراق اسمحلي انا اتصدمت من الكلام ده .. مش للدرجة دي خالص ، اما انهم عزاب وبايعين القضية بحالها او انهم مغامرون بيحبو المغامرة ... معنديش رد تاني ،

احنا هنا في الكويت وجوزي محاسب واتطلب منه بس يروح العراق لاناء بعض الامور المتعلقة لمدة يومين مقابل مبلغ ممتاز ... لكنه رفض بدون تردد لان الوضع غير مستقر هناك ... واحن اسرنه هيضحي بنفسه علشان قرشين هيضيعوا في ظرف شهر ... شوف مترجمين قد ايه مطلوبين هناك ولكنهم بيرفضوا ...
يعني ايه اروح ارمي نفسي في النار واقول ارحم من مصر ؟؟؟ دول مش نموذج يحتذى به ويياريتهم رايحين يخدمو اهل العراق ، كلنا عارفين هما رايحين يخدموا مين ويفدوا مين .. يهديهم ربنا

[Alex lover]

سما نورتيني يا قمر ... عايزة بس المح لحاجات يمكن لسه ماتعرفوهاش ، انا واخواتي طول عمرنا عايشين بعيد عن بعض بسبب وفاة والدينا اللي اتجوزت واللي سافر واللي عاش عند الجدة والي عاش لوحده ... وكنا بنتقابل زي الاصحاب انا واخواتي وتمنينا ان اليوم يجي ونتجوز علشان نكون أسر ونعوض (سنين عمرنا ) اللي ضاعت وبالفعل كل واحد اتجوز وجاب اولاده ومرة واحده طلعتلهم انا بموضوع سفري وكانت الصدمة لننا هنرجع نبعد تاني ، قوليلي امتى هتلم عليهم تاني امتى هنعيش مع بعض تاني ولا اتكتب علينا نعيش بعيد عن بعض ...ولما نتقابل كل سنة ويادوب نبدأ ناخد على بعد والاولاد يعرفو بعض ارجع ايسافر تاني
سما طبعا الحمد لله الف حمد والف شكر على كل حال لازم نكونحامدين وشاكرين بس تقدري تقولي دي فضفضة

[Alex lover]

أناناس حبيبتي نورتيني ... عجبني موقفك اللي بيشرح اللي كنت باقوله للسيد علي ياسين ربنا يجمعكم على خير دايما .. بس اسمحيلي اعرف انتي تقصدي نورا صاحبتنا في المنتدى ..؟

[nora]

أناناس حبيبتي نورتيني ... عجبني موقفك اللي بيشرح اللي كنت باقوله للسيد علي ياسين ربنا يجمعكم على خير دايما .. بس اسمحيلي اعرف انتي تقصدي نورا صاحبتنا في المنتدى ..؟


اه انا :36_1_35[1]: احنا اخوات انت متعرفيش وليا حد تاني كمان هنا حزري فزري متقوليش متعرفيش ده كلهم عارفين :36_11_18[1]:

انا باه موقفي من الغربه زي انا ناس تقريبا بس مع الاختلاف اني انا مرضتش ابدأ حياتي في الكويت ولما جيت اتجوزت فضلت ابدأ حياتي انا وزوجي في مصر رغم اني كنت بشتغل في مكان كويس جدا ووظيفه ممتازة بالنسبه لسني واي شخص يتمناها وزوجي كماان وفرتله شغلانه هناك بس قلنا ان عيلنا هيعانو من الغربه زي ما عنينا احنا و هيحسو طول عمرهم بالوحده وانهم عيشين جوة شنطه مش قادرين يحسو بالاستقرار و لو جوزي ضيع فرصة العمل الي هو كان فيها مش من السهل انه يرجع تاني مصر لنفس المكان او حتى لو فكرنا نرجع هيقدر يشتغل هنا بسهوله فاتكلنا على الله وبدأنا من هنا والحمد لله لم اندم على الخطوة دي ابدا رغم ان زي ما انا ناس قالت انا لسه برضو بنعاني من الغربه لان كل واحد فينا في حته لوحده فالواحد دايما حاسس انه غريب الغربه مش انك تكوني برة بلدك بس الغربه ممكن تكون عايشه جواكي معاكي فين متروحي لما تحسي انك مقطوعه من شجرة لما يجي العيد وتلاقي كل الي حواليكي اهل واصحاب وانت كده لوحدك ملكيش حد ياما ناس عيشه جوة بلادها لكن جواهم غربه ملهاش حدود
شكرا ليكي

[بنت من مصر]

أسمحوا لى أعبر عن رأئى فى الموضوع ده بالرغم من أنى عايشة فى بلدى مصر ومش مغتربة ولا حاجة .. بس والله صدقونى شعورك بالغربة فى بلدك أصعب بكتيييير من شعورك بالغربة بره بلدك لانك لو انت مسافر فأحساسك بالغربة ده طبيعى.. يمكن يزول أو ينتهى بمجرد عودتك لبلدك و الاستقرار فيها أو تاخد اجازة من الشعور الغربة فى أى زيارة قصيرة لبلدك إنما شعورك بالغربة وأنت فى بلدك ده شعور قاسى جداً وصدقونى أغلب المصريين بيعانوا بالغربة جوا بلدهم ... أنا عمرى ما فكرت أبداً انى أسافر وأسيب بلدى مهما حصل وضاقت بيا الظروف لكن من فترة قصيرة بس فكرت أن أبحث على عمل فى أى بلد تانية وأمشى حتى لو كان العائد المادى غير مجدى أو زى ما بعض الزملاء ذكروا أن اللى جاى هو هو اللى رايح مافكرتش فى العائد المادى كتيير ولا قليل ...لكنى فكرت فى أنى لوعيشت فى غربة بره بلدى يمكن تكون أهون عليا وأرحم من أحساسى فى الغربة جوه بلدى وفى وسط أهلى ( طبعاً أنا مش عاوزة أذكر لكم ليه زاد شعور المصريين بالغربة جوه بلدهم لأن أكيد انتم عارفين )

[علي ياسين]

أسمحوا لى أعبر عن رأئى فى الموضوع ده بالرغم من أنى عايشة فى بلدى مصر ومش مغتربة ولا حاجة .. بس والله صدقونى شعورك بالغربة فى بلدك أصعب بكتيييير من شعورك بالغربة بره بلدك لانك لو انت مسافر فأحساسك بالغربة ده طبيعى.. يمكن يزول أو ينتهى بمجرد عودتك لبلدك و الاستقرار فيها أو تاخد اجازة من الشعور الغربة فى أى زيارة قصيرة لبلدك إنما شعورك بالغربة وأنت فى بلدك ده شعور قاسى جداً وصدقونى أغلب المصريين بيعانوا بالغربة جوا بلدهم ... أنا عمرى ما فكرت أبداً انى أسافر وأسيب بلدى مهما حصل وضاقت بيا الظروف لكن من فترة قصيرة بس فكرت أن أبحث على عمل فى أى بلد تانية وأمشى حتى لو كان العائد المادى غير مجدى أو زى ما بعض الزملاء ذكروا أن اللى جاى هو هو اللى رايح مافكرتش فى العائد المادى كتيير ولا قليل ...لكنى فكرت فى أنى لوعيشت فى غربة بره بلدى يمكن تكون أهون عليا وأرحم من أحساسى فى الغربة جوه بلدى وفى وسط أهلى ( طبعاً أنا مش عاوزة أذكر لكم ليه زاد شعور المصريين بالغربة جوه بلدهم لأن أكيد انتم عارفين )

كلام صدق و الله و الكلام ده بيعبر عن كتير من المصريين و الله في مصر .... احسنتى يا بنت مصر ....

و في نوع اخر من الغربة اتمنى ان نتعرف عليه حتى تهون عليكم هذه الغربة التي انتم فيها ........ و ممكن تسمعه بنفسك في الرابط ده .......

http://www.almeshkat.net/media/open.php?cat=22&book=147

[أبو حميد]

الطبيعي أن يحن الإنسان لما هو محروم منه فالمغتربين يشعروا بالحنين لمصر التي يفتقدوها ولا يجدوها حاليا.والموجودين بمصر يحنون لفرصة يثبتوا بها أنفسهم ويحسنوا مستقبلهم هذا الفرصة لا يجدنوها في بلدهم ووسط أهلهم. كل هذا طبيعي فلا إختلاف بين وجهتي النظر وفي النهاية تبقى الغربة رغم صعوبتها الحل الأفضل في ظل الظروف التي يمر بها بلدنا حاليا فلو وجدنا فرصة جيدة في بلدنا ما تركناها.

[Mizo]

اتابع موضوعكم الشيق منذ بدايته.... وحسيت بكل كلمة مشاعر صداقة نابعة من القلب مفادها ومضمونها هو حب الوطن رايت بعض العبارات الساخرة من الفقر الذي يحيط بشعب المحروسة والذي يؤدي في النهاية الي اتجاهات سيئة من الجريمة الي السرقة...الخ ، وهنا نحن المغتربين احد الاتجاهات التي اشارت اليها وهي افضل من الجريمة والسرقة وخلافه... ولكن يا سادة يا كرام لن يعمر هذه البلد سوي التضحيات أجيال من قبلنا ذاقت مرار الحروب وذاقت مرار الفقر بأردأ انواعه... ونحن جيل يجب علينا التضحية ايضاً من أجل أجيال قادمة قد يكون ابنائنا هم رجالها... نعم تلقينا دروس قاسية في الغربة ولكن الاستمرارية مطلوبة حتي ينشأ هذا الجيل الجديد علي أسس ومفاهيم افتقدناها منذ نوعمة اظافرنا...سيكون بأذن الله ابني وابنكم هو أمل الأمة القادمة سنشقا ونتغرب حتي يصبح عزيز مكرم داخل وطنة الذي افتقدناه... نحن نحاول بتغيير الكثير والكثير داخل المحروسة وسيتغير بأذن الله ويستمتع به ابنائنا رجال وسيدات العصور القادمة...

كم اتمنا من الجميع ان يأخذ ظروفة القاسية بنظرة من الايجابية حتي نكون شعب قادر علي تخطي هذه الظروف الصعبة للمحروسة ( أم الدنيا).

تحياتي،،،

[Alex lover]

الطبيعي أن يحن الإنسان لما هو محروم منه فالمغتربين يشعروا بالحنين لمصر التي يفتقدوها ولا يجدوها حاليا.والموجودين بمصر يحنون لفرصة يثبتوا بها أنفسهم ويحسنوا مستقبلهم هذا الفرصة لا يجدنوها في بلدهم ووسط أهلهم. كل هذا طبيعي فلا إختلاف بين وجهتي النظر وفي النهاية تبقى الغربة رغم صعوبتها الحل الأفضل في ظل الظروف التي يمر بها بلدنا حاليا فلو وجدنا فرصة جيدة في بلدنا ما تركناها.

كلامك منطقي الي حد كبير ومحايد .. شكرا على مشاركتك

[Alex lover]

اتابع موضوعكم الشيق منذ بدايته.... وحسيت بكل كلمة مشاعر صداقة نابعة من القلب مفادها ومضمونها هو حب الوطن رايت بعض العبارات الساخرة من الفقر الذي يحيط بشعب المحروسة والذي يؤدي في النهاية الي اتجاهات سيئة من الجريمة الي السرقة...الخ ، وهنا نحن المغتربين احد الاتجاهات التي اشارت اليها وهي افضل من الجريمة والسرقة وخلافه... ولكن يا سادة يا كرام لن يعمر هذه البلد سوي التضحيات أجيال من قبلنا ذاقت مرار الحروب وذاقت مرار الفقر بأردأ انواعه... ونحن جيل يجب علينا التضحية ايضاً من أجل أجيال قادمة قد يكون ابنائنا هم رجالها... نعم تلقينا دروس قاسية في الغربة ولكن الاستمرارية مطلوبة حتي ينشأ هذا الجيل الجديد علي أسس ومفاهيم افتقدناها منذ نوعمة اظافرنا...سيكون بأذن الله ابني وابنكم هو أمل الأمة القادمة سنشقا ونتغرب حتي يصبح عزيز مكرم داخل وطنة الذي افتقدناه... نحن نحاول بتغيير الكثير والكثير داخل المحروسة وسيتغير بأذن الله ويستمتع به ابنائنا رجال وسيدات العصور القادمة...

كم اتمنا من الجميع ان يأخذ ظروفة القاسية بنظرة من الايجابية حتي نكون شعب قادر علي تخطي هذه الظروف الصعبة للمحروسة ( أم الدنيا).

تحياتي،،،



زيدان تعقيبا على كلامك لازم نزرع في نفوس اولادنا من دلوقتي حب الوطن ونشيد الاوطن ونذكر الايجابيات والسلبيات علشان مايتخيلوش انها جنة ويفاجأو ان فيه سلبيات كتيرة .. بالعكس نذكر النواقص ونذكرهم دائما انهم مسئولون عن اعادة بناء ما قد تم هدمه

شكرا على المشاركة

[toookaaa]

يا جماعة انا بس عايزة اقولكو حاجة صغيرة جدا
هى هتكون مداخلة صغيرة منى
كل ما تحسوا انكم فى غربة ياريت تكلمونا وتفضفضوا معانا
هو احنا مش بنمثل لبعض جو الاسرة ولا ايه
وقلبى عند كل ابن لمصر عايش خارجها
بس صدقونى انتو خارج مصر باجسادكم فقط انما ارواحكم ومشاعركم موجودة معانا هنا
واحنا لامسين هذا الشعور من خلا مشاركاتكم وحوارتكم وتعليقاتكم
وانا بحمد ربنا والله انى لقيت حد يعبر عن راى
وراى الاخرين
وانا حابه جو الاسرة الدافئ اللى احنا فيه ده مع بعض
فياريت محدش منكم يضايق نفسه
اكيد ان شاء الله هتستقروا باجسادكم فى بلدكم
وشكرا لكى يا اليكس على فتح هذا الموضوع

[Alex lover]

يا جماعة انا بس عايزة اقولكو حاجة صغيرة جدا
هى هتكون مداخلة صغيرة منى
كل ما تحسوا انكم فى غربة ياريت تكلمونا وتفضفضوا معانا
هو احنا مش بنمثل لبعض جو الاسرة ولا ايه
وقلبى عند كل ابن لمصر عايش خارجها
بس صدقونى انتو خارج مصر باجسادكم فقط انما ارواحكم ومشاعركم موجودة معانا هنا
واحنا لامسين هذا الشعور من خلا مشاركاتكم وحوارتكم وتعليقاتكم
وانا بحمد ربنا والله انى لقيت حد يعبر عن راى
وراى الاخرين
وانا حابه جو الاسرة الدافئ اللى احنا فيه ده مع بعض
فياريت محدش منكم يضايق نفسه
اكيد ان شاء الله هتستقروا باجسادكم فى بلدكم
وشكرا لكى يا اليكس على فتح هذا الموضوع

والله يا توكا انا باشكرك جدا على مشاعرك الرقيقة وعلى فكرة منتدانا ده فيه ميزة جميله مش هنلاقيها في اي مكان تاني وهي اننا مجموعة صغيرة مترابطة بتحاول تكبر متابعين اخبار بعض قلبنا على بعض حتي اللي مش في الكويت سواء في مصر او في فرنسا او دبي كأننا موجودين في مكان واحد ..
ربنا يجمعنا دايما على خير كده على طول :039:

[eltayer]

ميزه الموضوع ده اللي هو ربطنا بعض اكثر وكل واحد يحكي علي مشاعر الغربه اللي عنده وحبه لبلده وحنينه لها الموضوع شيق بالفعل والنتيجة ان احنا كلنا احساسنا واحد مع تغير البلدان

[الغريب]

أقسم بالله أنني أحب مصر
ولكن
أي مصر
مصر الحالية أم مصر السابقة
أعذروني في ما سأقوله ولكن هذا إحساس الملايين الذين لم يغادروا مصر لدقيقة - مصر الآن ليست لكل المصريين ، مصر هي بلد من يملك السلطة والجاه والمال - أعرف أن منكم الكثيرين سوف يعترضون على ما أقوله ولكن تلك هي الحقيقة التي يرفضها القلب ويصدقها العقل (الصامت جبراً)
ويكفيك يا مغترب شهر كل عام أو كل عامين تستطيع فيهم التمتع بمصر التي تريدها

[علي ياسين]

الأخ / الغريب ...........

الاحساس ده يا جماعة هو تقريبا احساس 90% من المصريين ...........

يا جماعة اوعوا تفتكروا ان كل الي عايز يسيب مصر بيكون بيقبض راتب قليل او مش لاقي ياكل .....لا لا لا

ممكن تلاقي من الناس الي عايزين يسيبوا البلد دى ناس بيقبضوا مرتبات كويسة و لكن في حاجة مفقودة بالنسبة ليهم ...

و هي الحياة الكريمة ........ مش عارف كلمة حياة كريمة دي مفهومة ليكم و لا لأ .....

لكن يا جماعة في مصر ..فعلا اصبح ما فيش امان ........

ممكن اديلكوا مثال بسيط كيف اصبحت الأوضاع في مصر ... ( و هذا المثال ممكن يكون بسيط و لكن موجود فعلا )

اسمع يا عم .....
بما انى و كثير ممن علي شاكلتى نعتبر ارهابيين في عرف القانون المصري و الأمريكي و الدولي ... لمجرد اننا اتبعنا رجلا اختاره الله و ارتضاه ان يكون رسولا للناس و هاديا و معلما للناس ...........المهم.

احد اصدقائي اوقفوه رجالا في الطرق العام و في وضح النهار ...و للدقة عند الجزار تحديداً ....
( مش عارف و الله ..... الظاهر ان اللحمة اصبحت حرام علي الفقراء حلال للاغنياء )

اخذوه ....لكي يدلهم علي بيته ..حتى يفتشوا عنده عن اي اسلحة نووية ...او اي مفاعلات نووية ....أو عن اي اعضاء من تنظيم القاعدة ... المهم ....

ظل عندهم ثلاثة ايام بدون اي جرم أو اي ذنب .........

و الله و انا اكتب اليكم هذا الكلام احاول ان اتمالك نفسي حتى لا تخونني عيني بالبكاء رغما عنى.......المهم

هذا كان يحدث للناس قبل هذه الايام بالليل و الناس تعرف الخبر بالنهار .... و لكن تحدث في النهار امام كل الناس ..
و الله حرام ...... و الله ثم و الله اسأل الله ان لم تكون هذه الحياة خيرا لى ان يقبضنى الله ....

كيف الحال يا اهل الغربة الذين تعانون من الغربة ........كيف بكم و ان عانيتم منها في بلدكم ..........

و الله اسأل ان يرحمنا ........ و الله انى لاعلم ان ما نحن فيه ما هو الا من ذنوبنا .......

يا رب اغفر لنا و رحمنا و اهدنا و عافنا و ارزقنا .............و السلام عليكم و رحمة الله و بركاته

[Alex lover]

رجعت اقرأ نفس الموضوع ده لاني حبيت اسأل نفسي سؤال

هل فعلا مازالت احاسيسي هي هي حتى الأن ؟؟؟

بصراحة اختلفت شويه


اللي اختلف هو احساسي بعدم الثقة بالنفس وعدم الأمان .. لأ شويه بدأت اخد على المكان وكونت صداقات كتير واصبحت الى حد ما اتأقلم وده كان لازم يحصل

اللي ماتغيرش هو حنيني لمصر بنفس الدرجة ونفس الشوق

ياترى انتو حد فيكم اتغيرت مشاعره ياريت كلكم تشاركوني الراي

[Lady]

السلام عليكم

عارفه يا اليكس..؟
انا بقلك من كل قلبي الله يعينك انت وكل البنات والشباب على الغربة
وفعلا الغربة شيء قاسي وبخلي الواحد يحس انه وحيد وبعيد عن الاحباب والقرايب طول الوقت
وكان فعلا معاه حق بابا لما يقلنا انه شوفتكم بتسوى كل الدنيا.. ورغم انه بشوف حاجات انا بتفاجأ لما اسمعها وببقى اقله نفسي اسافر مرة معاك"ان شاء الله على خير".. لكن هو حنينه لهنا اشد واقوى من انه يستمتع بين المناظر والحاجات اللي بشوفها !

فعلا السفر حاجه متعبة ومرهقة.. لكن اللي بجبر انه مصلحتها قوية
وعلى فكرة بابا نفس الشعور الي كان يحسه لما يبعد.. حتى كل ما يسافر اكتر تلاقيه اشتاقلنا اكتر من المرة اللي فاتت.. وحاسه انه صار يهكل همنا اكتر من الاول.. وخاصه اننا كبرنا عن زمان

بجد.. نفسي اخفف عنه من هاي الناحية واطمه.. لكن مو عارفه

على كل اتمناله التوفيق ويرجعلنا بأقرب فرصة

وانتم كمان الهي تتوفقوا وترجعوا لدياركم بأسرع وقت وتشوفوا الحبايب

امين يارب

[Alex lover]

ليدي ربنا يرجع لك والدك بالسلامة على خير وما يبعدكمش عن بعض تاني ابدا

[lumière]

والله يا جماعة أنا دخلت للموضوع بكيت وضحكت واندهشت وبكيت من ثاني وحسيت بمعنى الغربة في اشتياقكم للبلد, ربنا يصلح الحال

[سمـ مصر ــا]

ولفت الأيام ورجعنا نقول لترابك يابلدي مشتاقين

بس فرقت معايا يااليكس السنه دى إني عايزه الأيام تعدي بسرعه

وأطير بجناح مش بطياره علشان أرجع أضم حبيب قلبي لقلبي تاني